Foto: N. Baıbýlın
Saltanatty rásimge qatysýshylardy aıtýly merekemen quttyqtaǵan Máýlen Áshimbaev Jeńis kúni el tarıhynda jáne árbir qazaqstandyqtyń ómirinde erekshe oryn alatyn data ekenin atap ótti. Osyǵan baılanysty Memleket basshysynyń tapsyrmasymen barlyq óńirde Uly Jeńistiń 80 jyldyǵyna arnalǵan is-sharalar ótkizilip jatqany aıtyldy.
«Jeńis kúni – Qazaqstan halqy úshin aıryqsha mańyzǵa ıe mereke. Bıyl mereıli dataǵa oraı Prezıdentimiz Qasym-Jomart Kemeluly Toqaevtyń tapsyrmasymen elimiz boıynsha aýqymdy is-sharalar ótkizilip jatyr. Sonyń aıasynda 7 mamyr kúni Astanada áskerı sherý uıymdastyrylǵany belgili. Al, búgin biz Keńes Odaǵynyń Batyry, qazaqtyń qaharman qyzy Mánshúk Mámetovanyń eskertkishine arnaıy kelip turmyz. Mánshúk Mámetova 20 jasqa tolar-tolmas shaǵynda óz erkimen maıdanǵa attanyp, batyrlyq pen qaısarlyqtyń ozyq úlgisin kórsetti. Biz keler urpaqtyń beıbit zamany úshin óziniń ómirin qurban etken Mánshúk Mámetovanyń jáne barlyq maıdangerdiń erlikterin eshqashan umytpaımyz. Soǵysqa qatysqan aǵa býyndy ardaqtap, rýhtaryna taǵzym etý – bizdiń azamattyq paryzymyz», degen Máýlen Áshimbaev ardagerlerge zor densaýlyq jáne olardyń otbasylaryna baq-bereke tiledi.
Sonymen qatar búgin Palata Spıkeri bir top depýtatpen birge soǵys ardageri Vasılıı Serdıýkovty Jeńis kúnimen quttyqtady. Vasılıı Serdıýkov 1943 jyly 17 jasynda maıdanǵa attanǵan. Kezdesýde ardager quttyqtap kelýshilerge óz alǵysyn bildirip, batasyn berdi.
Vasılıı Antonovıch soǵys jyldarynda Belarýssııadaǵy artıllerııalyq ásker qatarynda jáne 26-shy mınomet brıgadasynda bolyp, Mınsk pen Varshavany azat etýge qatysty. Sondaı-aq ol Jeńisti Reıhstagta júrip qarsy alǵanyn atap ótken jón.
